म्याग्दी, बैशाख-२५, ‘सेवा नै धर्म हो’ भन्ने मूल नारासहित आज (आइतबार) विश्व रेडक्रस दिवस मे ८ म्याग्दीमा विविध कार्यक्रमको आयोजना गरी मनाइएको छ । नेपाल रेडक्रस सोसाइटी पुलाचौर उपशाखाको आयोजनामा ज्येष्ठ रेडक्रसकर्मी तथा समाजसेवी सम्मान एवं सहयोग हस्तान्तरण गरी विश्व रेडक्रस दिवस मनाइएको हो ।
दिवसको अवसरमा ज्येष्ठ रेडक्रसकर्मी तथा समाजसेवी बेनी नगरपालिका–५, पुलाचौर भीरमुनीका ८६ वर्षीय बेलबहादुर खत्री र पुलाडाँडाका ८२ वर्षीय रामबहादुर बानियाँलाई अबिर, खादा र माला लगाएर सम्मानपत्र सहित सम्मान गरिएको छ । यसैगरी कार्यक्रमको अवसरमा भीरमुनीको खोरगैरा निवासी मृर्गौलापीडित मनिसरा नेपालीलाई रेडक्रस उपशाखामार्फत सङ्कलित सातहजार दुईसय पाँच रुपैयाँ सहयोग हस्तान्तरण गरिएको छ ।
त्यस्तै पुलाचौर निवासी दिर्घरोगी तथा विपन्न परिवारहरु रत्नकुमारी दर्जी र नैनकली दर्जी तथा पुरुन्डी बाच्छाबान्नाका विपन्न सेते दर्जीलाई एक/एक बोरा चामल, नुनतेल, चिनीलगायत दैनिक उपभोग्य खाद्यान्न सामग्रीहरु हस्तान्तरण गरिएको छ । उक्त सामग्रीहरु रेडक्रस उपशाखा सभापति शिव बानियाँ, कोषाध्यक्ष गिरेन्द्र बानियाँ, विपद् व्यवस्थापन समितिका सचिव गजिन्द्र श्रेष्ठ, आजीवन सदस्य कपिल केसीसहितको टोलीद्वारा विपन्नको घरमै पुगेर हस्तान्तरण गरिएको थियो ।
यसैबीच रेडक्रस पुलाचौर उपशाखाका संस्थापक सचिव तथा पूर्व वडा सदस्य पूर्णबहादुर बानियाँले आफ्नी स्वर्गीय आमा हरिकला बानियाँको सातौं दिनको पुण्यतिथिमा विश्व रेडक्रस दिवसको अवसर पारी गरिब तथा विपन्न परिवारलाई सहयोग गर्नेगरी रु. २५ हजार रुपैयाँ सहयोग गर्नुभएको छ । रेडक्रसका संस्थापक जाँ हेनरी ड्युनाको तस्विरमा माल्यार्पण गरी कार्यक्रमको उद्घाटन गर्दै पुलाचौरका वडा अध्यक्ष लक्ष्मण बानियाँले सामाजिक क्षेत्रमा रेडक्रसले गर्दै आइरहेको सहयोग अतुलनीय रहेको बताउनुभयो । उहाँले पुलाचौर रेडक्रस उपशाखाले वडा कार्यालयसँग आवश्यक समन्वय गरी कोरोना नियन्त्रणको समयमा समुदायमा पुगेर विभिन्न किसिमका सचेतनामूलक कार्यक्रमहरु सञ्चालनमा गरेकोमा प्रशंसा समेत गर्नुभएको थियो ।
कार्यक्रमको अवसरमा रेडक्रस पुलाचौरका विशिष्ट सदस्यत्रय हेमबहादुर खत्री, अर्जुन बानियाँ र सुर्यबहादुर खत्रीलाई अबिर, फुलमाला तथा खादा लगाएर सम्मान गरिएको थियो । कार्यक्रममा रेडक्रस पुलाचौर उपशाखाका संस्थापक सदस्य एवं पूर्व कोषाध्यक्ष समेत रहनुभएका सम्मानित व्यक्तित्व खत्री, कार्यक्रम संयोजक सृष्टि लामिछाने बानियाँ र जनकल्याण माध्यमिक विद्यालय पुलाचौरको युवा रेडक्रस सर्कलका प्रतिनिधि प्रज्ञा बानियाँले मन्तव्य व्यक्त गर्नुभएको थियो ।
कार्यक्रम रेडक्रस पुलाचौरका सभापति शिव बानियाँको अध्यक्षता, उपसभापति मिना शाहीको स्वागत र सचिव रेशम बानियाँको सञ्चालनमा सम्पन्न भएको थियो । यस्तै दिवसकै अवसरमा रेडक्रस म्याग्दी शाखाले पनि बेनी अस्पतालमा उपचाररत रहेका बिरामीहरुलाई मौसम अनुकुल हुने गरी विभिन्न प्ररकारका फलफुलहरु वितरण गरी दिवस मनाएको जनाएको छ ।
रेडक्रसको अभियानले हरेक वर्ष विश्वभरी सशस्त्र संघर्ष, प्राकृतिक प्रकोप र अन्य आकस्मिक परिस्थितिमा प्रभावित नागरिकलाई सेवा पुर्याउँदै आइरहेको छ । विश्वका १ सय ९० भन्दाबढी देशहरुमा रेडक्रस सामाजिक संस्थाको रुपमा क्रियाशील रहेको छ ।
