म्याग्दी, भदौ-१३, अविरल बर्षाका कारण पहिरो खसेर म्याग्दी हुँदै मुस्ताङलाई जोड्ने बेनी–जोमसोम सडक फेरि बन्द भएको छ । सडक खण्डअन्तर्गत म्याग्दीको अन्नपूर्ण गाउँपालिका ३ दानाको गुईँठे, रुप्से खोला र काभ्रे भिर क्षेत्रमा साँझ ५. ३० बजे तिर लेदो माटो खसी सडक बन्द भएको जिल्ला प्रहरी कार्यालय म्याग्दीका सूचना अधिकारी प्रहरी निरीक्षक बिरेन्द्र राज गुरुङले बताउनुभयो ।
अहिले पनि वर्षा भइरहेकाले सडक खुलाउन समस्या भएको छ । पहिरो पन्छाउनका लागि सडक आयोजनाको डोजर, एक्स्काभेटर लगायतका सामान तयारी अवस्थामा राखिएको भए पनि निरन्तर पानी परिरहेको र पहिरो खस्ने जोखिम रहेकाले काम गर्न नसकिएको उहाँले बताउनुभयो ।
