म्याग्दी, चैत-१७, बेनीको डम्मरामा पार्किंगमा राखिएको गाडीमा आगजनी भएको छ । बिहिबार बिहान अन्दाजी ४ बजे बेनी दरबार सडक अन्तर्गत बेनी नगरपालिका- ६, डम्मरामा पार्किंगमा राखिएका दुइवटा गाडीमा अज्ञात व्यक्तिले आगजनी गरेको म्याग्दी प्रहरीले जनाएको छ ।
सडकको छेउमा पार्कगरेर राखिएका ध १ ज ९८६ नम्बरको इको भ्यान र ध १ ज ७२६ नम्बरको ट्याक्सीमा आगोलागी भएको हो । आगोलागी भएका गाडी बुधबार साँझ एक आपसमा ठोक्किएर दुर्घटना भएका थिए । दुर्घटना भएको गाडीलाई स्थानीयद्वारा नालिबाट उठाएर सडक छेउमा राखिएको थियो । प्रहरीका अनुसार दुवै गाडीधनीहरु एक आपसमा गाडी मर्मत गर्ने सहमति गरेका थिए तर बिहिबार बिहान भने गाडीमा आगो लगाइएको भेटिएको हो ।
जिल्ला प्रहरी कार्यालय म्याग्दीका सुचानाधिकारी प्रहरी निरक्षक बिरेन्द्र गुरुङले घटनाको प्रकृति अल्ली फरक देखिएकोले अनुसन्धान भैरहेको जनाउनुभएको छ ।
