काठमाडौँ, फागुन-७, आईसीसी पुरुष टी–२० विश्वकप ग्लोबल छनोट अन्तर्गत नेपालले फिलिपिन्सलाई १ सय ३६ रनले हराउँदै सेमिफाइनल नजिक पुगेको छ ।
ओमानको अल अमेरात क्रिकेट मैदानमा आज २ सय १९ रनको लक्ष्य पछ्याएको फिलिपिन्सले निर्धारित २० ओभरमा ८ विकेट गुमाउदै मात्र ८२ रन जोड्न सक्यो ।
नेपालको यो लगातार दोस्रो जित हो । यस अघि नेपालले आयोजक ओमानलाई ३९ रनले पराजित गरेको थियो ।
चार अंकसहित शीर्ष स्थानमा रहेको नेपालको रनरेट पनि ४ दशमलव ३७५ रहेको छ । दोस्रो स्थानमा रहेको क्यानडाको २ अंक छ भने रनरेट २ दशमलव ५१२ रहेको छ । तेस्रो स्थानको ओमानको पनि २ अंक नै छ तर रनरेट माइनस ५६३ रहेको छ । फिलिपिन्स बाहिरिसकेको छ ।
ग्लोबल छनोटमा ८ वटा देश दुई वटा समूहमा छन् । नेपाल, ओमान, क्यानडा र फिलिपिन्स समूह ‘बी’ मा छन् । दुई समूहबाट शीर्ष दुई-दुई टोलीले सेमिफाइनलमा स्थान बनाउने छन् ।
