पर्वत, असोज-३१, दक्षिण एसियाली फुटबल प्रतियोगिता SAFF च्याम्पियनसिपमा उपविजेता बनेको नेपाली राष्ट्रिय फुटबल टोलीलाई पर्वतको कुस्मा नगरपालिकाले २ लाख रुपैयाँ पुरस्कार दिने घोषणा गरेको छ ।
हिजो राती सम्पन्न फाइनलमा भारतसँग ३–० गोलअन्तरले पराजित भएपछि नेपाली टोली उपाधि जित्न चुकेको थियो । तर नेपाल पहिलोपल्ट साफ च्यामिपयनसिपको फाइनलमा पुगेको हो ।
कुस्मा नगरपालिका प्रमुख रामचन्द्र जोशीले पहिलोपल्ट फाइनलमा पुगेको नेपाली टोलीलाई थप हौसला र प्रोत्साहनका लागि पुरस्कारको घोषणा गरेको जानकारी दिए । उनले फेसबुकमा स्टाटस लेख्दै प्रोत्साहन स्वरुप दुई लाख रुपैया पुरस्कार दिने घोषणा गरेका छन ।
नेपाली टोली भोलि विहान स्वदेश फर्किँदैछ ।
