म्याग्दी, भदौ-२९, कोरोना संक्रमणका कारण बैशाख दोश्रो साता देखि बन्द रहेका सबै शैक्षिक संस्थाहरु आगामी असोज १ गते देखि खुल्ने भएका छन्। जिल्ला प्रशासन कार्यालयमा सोमबार बसेको कोभिड–१९ संकट व्यवस्थापन केन्द्रको बैठकले जिल्लाका सबै शैक्षिक संस्था खुलाउने निर्णय गरेको हो।
कोरोना (भाइरस)को दोस्रो लहरको महामारी फैलिएपछि विद्यालयमा भौतिक उपस्थितिमा पठनपाठन बन्द गरिएको थियो। कोभिड–१९ सम्बन्धी सुष्म योजना र ‘स्मार्ट लकडाउन’को अवधारणा अनुसार विद्यालय खुलाउने निर्णय गरिएको प्रमुख जिल्ला अधिकारी गणेशबहादुर अधिकारीले बताउनुभयो।
प्रजिअ अधिकारीका अनुसार कोरोना संक्रमणको दर घटेकाले स्वास्थ्य सुरक्षाका मापदण्ड कडाइका साथ पालना गरेर भौतिक उपस्थितिमै पठनपाठन गराउने निर्णय भएको हो।
