पर्वत, असार-२०, पर्बतको कुश्माका एक पुरुष छ दिनदेखि बेपत्ता भएका छन् कुश्मा नगरपालिका-१४, आर्थर डाँडाखर्कका ६७ वर्षीय बालकृष्ण विक गत असार १५ गतेदेखि सम्पर्कविहीन भएका हुन् ।
श्रीमान–श्रीमती बीच असार १४ गते सामान्य घर झगडा भएका कारण बिहान करिब ८ बजेतिर घरबाट निस्किएका उनि अहिलेसम्म पनि कसैको सम्पर्कमा नआएको स्थानीयवासी शिक्षक सुरेन्द्र शर्मा गौतमले जानकारी दिनुभयो ।
मिजासिलो र खुशी देखिने उनि १५ गते बिहान घरबाट निस्किएकोमा झगडाको रिस मरेपछि घर फर्कन्छन होला भन्ने लागेकोमा अहिलेसम्म पनि नआएको शिक्षक गौतमले बताए । बालकृष्णका छोरा विदेशमा र बुहारी पोखरामा बस्दै आएकी छिन भने घरमा बिककी श्रीमती मात्रै रहेकी छिन ।
कसैले कुश्मा नगरपालिकाको दोबिल्लास्थित सन्तोषचोकमा देखेको बताएको भए पनि कता गए भन्ने खुलेको छैन । जिल्ला प्रहरी कार्यालय पर्वतका प्रमुख प्रहरी नायब उपरीक्षक शिवराज बुढाथोकीले बालकृष्ण बेपत्ता रहेको र खोजी गरिदिन भनी परिवारको तर्फबाट निवेदन आएलगत्तै खोजी भइरहेको भए पनि अवस्थाबारे पत्ता लाग्न नसकेको जानाकारी दिए ।
