पर्वत, असार-१५, पर्वतमा एक वृद्दलाइ गरगहना लुटेर कुटपिट गरिएको छ । कुश्मा नगरपालिका–४ घुम्तीमा बाख्रा चराउन गएको समयमा उहाँले लगाएका गहना लुटेर चरम यातना दिदै कुटपिट भएको घटना बाहिर आएको हो ।
पोखरा–बागलुङ सडकसँगै जोडिएको घुम्तीमा बस्दै आएकी ७५ वर्षिया कलावती अर्यालमाथि गत असार ११ गते साँझ लुटपाट भएको र त्यसपछि मरणासन्न हुने गरी कुटपिट भएको हो । घरभन्दा एक सय मिटर माथि रहेको जङ्गलको छेउमा बाख्रा चराइरहेको बेलामा अन्दाजी १९/२० वर्षका दुई जना युवाहरूले कानमा लगाएको करिब डेढ तोलाका सुनका मुन्द्रा लुछ्दै कुटपिट गरेका उहाँका छोरा सन्तोष अर्कायालले बताउनु भएको छ ।
लुटेराले केही बेर आफूसँगै राम्रा कुराकानी गरेको र कोहि मान्छे आवतजावत नगरेको अवस्थामा कानमा लगाएका गहना लुटेर ढुंगा र मुड्कीले हिर्काएको पीडित पिडित वृद्दले बताउनुभयो । जङ्गल छेउमा चरेका बाख्रा लिन गएको बेलामा कोही नभएको मौकामा घोप्टो पारेर पल्टाउदै गहना तान्दै पछाडिबाट पिठ्यूँ र टाउकोमा ढुङ्गा र मुड्कीले हान्नुसम्म हानेको उहाँले बताउनुभयो
उहाँको टाउकोमा दुई ठाउँमा काटेकोले आठ वटा टाँका लगाइएको छ भने भाँचिएको हात प्लास्टर गरिएको छोरा सन्तोषले बताउनुभयो ।
घट्नाको विषयमा अनुसन्धान चलिरहेको र शंकास्पदहरुलाई प्रहरी कार्यालयमा उपस्थित गराएर केरकार गर्ने काम भइरहेको जिल्ला प्रहरी कार्यालय पर्वतका सूचना अधिकारी प्रहरी निरीक्षक राजेन्द्र अधिकारीले बताउनुभएको छ ।
