बाग्लुंग, बैशाख-२७, जिल्लाको निसीखोला गाउँपालिकामा माटोको ढिस्कोले पुरिएर २ जनाको ज्यान गएको छ । शुक्रबार घर नजिकै माटो खन्ने क्रममा माथिबाट खसेको ढिस्काले पुरिएर आमा छोराको मृत्यु भएको हो । स्थानीय ३३ वर्षीया भवी कुँवर र उनकी १२ वर्षीय माइलो छोरा सुरेश कुँवरको घटनास्थलमै मृत्यु भएको निसीखोला गाउँपालिका २ का अध्यक्ष कुविर विकले जानकारी दिनुभयो । उहाँले भन्नु भयो “माटोले पुरिएका आमा छोराको केही बेरमै स्थानीयले उद्धारको प्रयास गरे पनि बचाउन सकिएन ।”
घटनापछि अहिले इलाका प्रहरी कार्यालय झिँवाखोलाका प्रमुख जयराम वन्तसहितको टोली घटनास्थलमा पुगेको छ । प्रहरी र स्थानीयको सक्रियतामा माटोले पुरिएकाको शव निकालिएको प्रहरी निरीक्षक भण्डारीले जानाकारी दिनुभयो ।
शवको पोष्टमाटम गरि अन्त्येष्टीको तयारी गरिएको बताइएको छ । मृतक भवी कुवँरका श्रीमान रोजगारीका क्रममा भारतमा रहेको परिवारले बताएको छ ।
