पोखरा, बैशाख ४- गायक तथा संचारकर्मी कृष्ण सुवेदी र गायिका सुनिता नेपालीको आवाज रहेको ‘धोका’ गीत सार्वजनिक भएको छ । गीतको लय तथा शब्द सिर्जना गायक सुवेदी आफैले गर्नु भएको हो । गीतको एरेन्ज चर्चित एरेन्जर तारानाथ आचार्यले गर्नु भएको हो भने गीत काठमाण्डौं र डिजिटल स्टार पोखरामा गीत रेकर्ड भएको हो ।
२०६३ सालबाट औपचारिक साङ्गीतिक यात्रा सुरु गर्नुभएका सुवेदी पछिल्लो समय गायन, शब्द लय सिर्जनासँगै निर्देशन र अभिनयमा समेत उतिकै सक्रिय हुनुहुन्छ । गीतको भिडियो निर्देशन सुबेदी आफैले गर्नु भएको हो । प्रेममा धोका खाएको प्रसङ्गमा तयार भएको भिडियो कृष्ण सुवेदी युट्युब च्यानलबाट सार्वजनिक भएको हो ।
‘थोरै मात्र प्रेममा सफल हुन्छन्, धेरै त असफल हुन्छन्’ भन्ने विषयवस्तुलाई गीत र भिडियोमा समेटिएको छ । भिडियोमा लोमश शर्मा र सुनिता नेपालीको मुख्य अभिनय हेर्न पाइन्छ ।
गीत सुनेर तथा भिडियो हेरेर प्रतिक्रिया दिन दर्शक श्रोता समक्ष निर्देशक तथा गायक सुवेदी एवं गायिका नेपालीको आग्रह छ । सुबेदी रेडियो अन्नपूर्ण पोखरामा कार्यरत हुनुहुन्छ ।
