टोकियो, जापानमा खोपले दिने सुरक्षा कम गर्ने कोरोनाभाइरस भेटिएको जापानको सरकारी समाचार संस्था एनएचकेले जनाएको छ ।
गत महिना टोकियो अस्पतालमा परीक्षण गरिएका मध्ये करिब ७० प्रतिशतमा खोपबाट हुने सुरक्षा घटाउने भाइरस भेटिएको एनएचकेलाई उद्धृत गर्दै समाचार संस्था रोयटर्सले जनाएको छ ।
मार्चमा टोकियो मेडिकल एन्ड डेन्टल युनिभर्सिटी मेडिकल हस्पिटलमा भेटिएका १४ संक्रमितमध्ये १० जनामा ‘ई४८४के’ म्युटेसन पाइएको प्रतिवेदनमा जनाइएको छ ।
पछिल्लो दुई महिनामा ३६ संक्रमितमध्ये १२ जनामा यो प्रकारको नयाँ भाइरसको संक्रमण देखिएको थियो । उनीहरु न विदेश गएका थिए न त विदेश गएकासँग सम्पर्कमा नै थिए ।
आउँदो जुलाइमा हुने ओलम्पिक्सको तयारी चलिरहँदा जापानमा संक्रमणको नयाँ लहर देखिएको छ । शुक्रबार राजधानी टोकियोमा ४४६ संक्रमित भेटिँदा ओसाका सहरमा ६६६ जनामा संक्रमण पुष्टि भएको थियो ।
बेलायतमा भेटिएको उत्परिवर्तित भाइरस जापानका पश्चिमी नगरहरुमा फैलिने क्रम बढेकोप्रति यहाँका स्वास्थ्यविज्ञहरुले चिन्ता व्यक्त गरेका छन् । यद्यपि, टोकियो अस्पतालका बिरामीहरुमा भने बेलायतमा देखिएको भाइरसको संक्रमण नपाइएको एनएचकेले जनाएको छ ।
