ओलीको निर्णय पछी नेपाल पक्षले स्थायी समितिको आकस्मिक बैठक बोलायो

नेकपा एमाले माधव पक्षले आकस्मिक बैठक बोलाएको छ ।  प्रधानमन्त्री तथा नेकपा (एमाले) अध्यक्ष केपी शर्मा ओलीले आफूलाई जानकारी नै नदिई  महाधिवेशनको मिति तोकेपछि नेता माधवकुमार नेपाल पक्षले आकस्मिक रूपमा स्थायी कमिटी बैठक बोलाएको हो ।

नेपाल पक्षका एक नेताले दिएको जानकारीअनुसार केहीबेरमा नयाँ बानेश्वरस्थित अर्याल होटलमा बैठक बस्न लागेको छ। बैठकले ओलीले चालेको कदमपछि अब कसरी अघि बढ्ने भन्नेबारेमा निर्णय गर्ने बताइएको छ।

यसअघि अध्यक्ष ओलीले शुक्रबार प्रधानमन्त्री निवास बालुवाटारमा आफ्नो पक्षका  केन्द्रीय सदस्यहरूको बैठक राखेर महत्वपूर्ण निर्णयहरू गरेका थिए। ओली समुहले गरेका निर्णयहरु यस्ता छन् :

• बाधा अडकाउ फुकाउअन्तर्गत पार्टीको विधान संशोधन।
• पूर्वमाओवादी केन्द्रका २३ जनालाई स्थायी समिति र केन्द्रीय सदस्यमा मनोनयन।
• अध्यक्ष र महासचिवबाहेक पार्टी पदाधिकारी खारेज।
• २०७८ मंसिर २-६ गतेसम्म पार्टीको महाधिवेशन गर्ने।
• पार्टी प्रवक्ताको जिम्मेवारी प्रदीप ज्ञवालीलाई दिने।
• माधव नेपाल पक्षका प्रदेश इञ्चार्जहरूलाई हटाएर आफू पक्षका नेताहरूलाई जिम्मेवारी दिने।