बेनी, माघ-१७, नेपाल तरुण दल म्याग्दीले नेपाल तरुण कप भलिबल प्रतियोगिता २०८१ आयोजना गर्ने भएको छ। यस प्रतियोगिताको जानकारी दिन नेपाली कांग्रेस म्याग्दीको पार्टी कार्यालय संगमचोकमा पत्रकार सम्मेलन आयोजना गरिएको थियो।
प्रतियोगिता दुई चरणमा आयोजना हुनेछ। म्याग्दी क्षेत्र ‘ख’ अन्तर्गत वडा क्षेत्रीय पुरुष भलिबल प्रतियोगिता फागुन ७, ८ र ९ गते मालिका गाउँपालिकाको वडा नं. ६ दरबाङमा आयोजना हुनेछ। त्यस्तै, म्याग्दी क्षेत्र ‘क’ अन्तर्गत वडा क्षेत्रीय पुरुष भलिबल प्रतियोगिता र अन्तर पालिका जिल्लास्तरीय महिला भलिबल प्रतियोगिता फागुन १४, १५ र १६ गते अन्नपूर्ण गाउँपालिकाको वडा नं. ४ नारच्याङ्कमा आयोजना गरिनेछ। तरुण दल म्याग्दीका सचिव सुमन बानियाँले यसको जानकारी दिनुभयो।
प्रतियोगितामा पुरुष र महिला दुबै वर्गका विजेताहरूलाई आकर्षक पुरस्कार प्रदान गरिनेछ। पुरुष प्रतियोगितामा प्रथम हुने टोलीले रु. १ लाख ११ हजार १११, ट्रफी, मेडल र प्रमाणपत्र पाउनेछन् भने दोस्रो स्थान हासिल गर्ने टोलीले रु. ६६ हजार ६६६, ट्रफी, मेडल र प्रमाणपत्र पाउनेछन्। महिला प्रतियोगितामा प्रथम हुने टोलीले रु. ७७ हजार ७७७ र दोस्रो स्थान हासिल गर्ने टोलीले रु. ४४ हजार ४४४, ट्रफी, मेडल र प्रमाणपत्र पाउनेछन्।
तरुण दलका कार्यवाहक अध्यक्ष प्रसाद रोकाका अनुसार, यो प्रतियोगिता म्याग्दीमा भलिबल खेलको लोकप्रियता बढाउने, खेल प्रतिभाको विकास गर्ने र युवाहरूलाई रचनात्मक कार्यमा संलग्न गराउने उद्देश्यले आयोजना गरिएको हो। उनले तरुण दलले पहिला पनि यस्ता कार्यक्रमहरू सफलतापूर्वक आयोजना गरेको बताउनुभयो। म्याग्दी जिल्लाबाट राष्ट्रिय स्तरका भलिबल खेलाडीहरू उत्पादन भएको र यसले जिल्लाको खेल क्षेत्रको विकासमा महत्वपूर्ण योगदान दिएको उनले जोड दिनुभयो।
प्रतियोगिताको उद्घाटन समारोहमा प्रदेश तथा केन्द्रिय मन्त्रीहरूलाई निमन्त्रणा गरिएको छ। यसले जिल्लाको अन्य विकासमा पनि सहयोग पुग्ने अपेक्षा गरिएको छ। प्रतियोगिताको कुल खर्च रु. १५ लाख ५० हजार राखिएको छ भने पुरुष टोलीको दर्ता शुल्क रु. ६ हजार र महिला टोलीको दर्ता शुल्क रु. ४ हजार राखिएको छ। तरुण दलका कोषाध्यक्ष पदम छन्त्यालले यसको जानकारी दिनुभयो।
यस प्रतियोगितामा स्थानीय तथा राष्ट्रिय स्तरका कलाकारहरूको सांस्कृतिक प्रस्तुति पनि हुनेछ। यसरी म्याग्दी जिल्लामा खेलकुद र सांस्कृतिक गतिविधिहरू प्रवर्द्धन गर्ने उद्देश्यले यो कार्यक्रम आयोजना गरिएको छ।
