म्याग्दी, कार्तिक-१, नेकपा एमाले शहिद स्मृति प्रतिष्ठान म्याग्दीले २२ औं मणि स्मृति दिवस मनाएको छ । नेकपा एमाले म्याग्दीका सचिवालय सदस्य रहनुभएका अधिकारीको २२ वर्ष अघि आजकै दिन हत्या भएको थियो । बेनी नगरपालिका–४ (साविक सिङ्गा गाविस–६, तातोपानी मसार) निवासी अधिकारीलाई ०५९ साल कात्तिक १ गते तत्कालीन नेकपा माओवादीका कार्यकर्ताले विभत्स हत्या गरेका थिए।
अधिकारीको निबास नजिकै रहेको सरस्वती प्रा.वि (हाल मावि) नजिकै ‘केही कुरा गर्नु छ’ भनेर बोलाई घाँटी रेटेर, टाउको र पेटमा खुकुरी प्रहार गरी हत्या गरिएको थियो। हत्या हुँदा अधिकारी ५८ वर्षका हुनुहुन्थ्यो । उहाँ महेन्द्ररत्न माविका प्रधानाध्यापक, नेपाल राष्ट्रिय शिक्षक संगठनका केन्द्रीय सदस्य र नेकपा एमाले म्याग्दीका सचिवालय सदस्यसमेत हुनुहुन्थ्यो ।
समाजमा मर्यादित, निडर र तर्कशील व्यक्तित्वका रूपमा परिचित अधिकारीको हत्या माओवादीले आफ्नो संगठन विस्तारमा चुनौती भएको ठानेर गरेका थिए।
शहिद स्मृति दिवसको अवसरमा आयोजना गरिएको कार्यक्रममा प्रतिष्ठानका अध्यक्ष अमर बानियाको अध्यक्षतामा सम्पन्न कार्यक्रममा बोल्ने प्रमुख वक्ताहरूले अधिकारीको योगदान र व्यक्तित्वको चर्चा गर्नुभएको थियो । कार्यक्रममा नेपाल राष्ट्रिय शिक्षक संगठनका रामप्रसाद सुवेदी, जयराम सुवेदी, नेकपा एमाले बेनी नगर कमिटीका कृष्ण सिंह बानिया, गण्डकी प्रदेश सचिवालय सदस्य हरिकृष्ण, केन्द्रीय सदस्य भुपेन्द्रबहादुर थापा र स्थायी समिति सदस्य थममाया थापा लगायतले मणीलाल अधिकारीको साहसिक नेतृत्व, शिक्षा क्षेत्रमा गरेको योगदान, र समाज परिवर्तनका लागि देखाएको निडरता स्मरण गर्नुभएको थियो ।
