बेनी, असोज-१५, म्याग्दीको बेनी स्थित न्यु वेष्ट पोइन्ट आवासीय माविमा संचालित बृहत खेलकुद सप्ताहको समापन गरिएको छ ।असोज १० गतेदेखि संचालन भएको खेलकुद सप्ताहको आज १५ गते भब्य समारोह बीच समापन गरिएको हो ।
समारोहको शुभारम्भ गर्दै कार्यक्रमका प्रमुख अतिथि जिल्ला खेलकुद विकास समितिका अध्यक्ष दिनेश केसीले न्यु वेष्ट पोइन्ट विद्यालयले खेलकुदको क्षेत्रमा पुर्याएको योगदानको प्रशंसा गर्नुभयो । उहाँले यस विद्यालयले लामो समयदेखि जिल्ला, प्रदेश हुँदै राष्ट्रिय र अन्तराष्ट्रिय स्तरका खेलाडी उत्पादन गरेको र खेल क्षेत्रको एक उदाहरणीय विद्यालय भएको बताउनुभयो । विद्यार्थीलाई पढाइ संगसंगै खेलकुद पनि आवश्यक रहेको र विद्यालयले नियमित रुपमा यस्ता कार्यक्रमको आयोजना गर्दा खेल क्षेत्रमा लाग्ने विद्यार्थीलाई हौसला मिलेको बताउनुभयो ।
त्यसैगरी कार्यक्रमका विशेष अतिथि बेनी नगरपालिका शिक्षा शाखा प्रमुख कमल ढकालले कार्यक्रम हेर्दा आफु निकै प्रभाववित भएको र धेरै धेरै भन्दा विद्यार्थीलाई कुनै न कुनै खेलमा समाबेश गरेर अवसर प्रदान गरेकोमा विद्यालयको सह्राना गर्नुभयो ।उहाँले आफुले खेलकुदको ब्यबस्थापन र प्रस्तुति हेर्दा निकै आकर्षक र स्तरीय लागेको बताउनुभयो ।
जिल्ला ट्राफिक प्रहरी कार्यालय म्याग्दीका प्रमुख, प्रहरी बरिष्ठ नायब निरीक्षक राजकुमार केसीले आफुले यो कार्यक्रमक हेर्दा निकै आनन्द लागेको बताउनुभयो । उहाँले विद्यार्थीको खेल कौशलता र उनीहरुले गरेको प्रस्तुतिको प्रशंशा गर्नुभयो साथै उहाँले कार्यक्रममा ट्राफिक सचेतनाका बारेमा समेत संक्षिप्त जानाकारी समेत प्रस्तुत गर्नुभएको थियो ।
शिक्षक अभिभावक संघका अध्यक्ष बिष्णु रोका मगरले विद्यायलले शैक्षिक र खेलकुद क्षेत्रको बिकासमा पुर्याएको महत्वपुर्ण योगदानको चर्चा गर्दै यसरी खेलकुदमा विद्यार्थीहरुलाई समाबेश गर्दा विद्यार्थीको शारीरिक र मानसिक बिकासमा सघाउ पुग्ने बताउनुभयो ।
सामपन कार्यक्रममा विद्यार्थीहरुद्वारा मार्चपास मसाल दौड, कवाज,ड्रिल, समेत प्रस्तुत गरिएको थियो । कार्यक्रममा प्रतियोगितात्मक रुपमा कक्षा १ देखि कक्षा १२ सम्मका खेलकुद समाबेश गरेको खेल शिक्षक दिपेन राइले बताउनुभयो । १४ सय ७५ जना विद्यार्थीमध्ये ८ सय विद्यार्थीहरुले कुनै न कुनै खेलमा सहभागिता जनाएको उहाँले बताउनुभयो ।
प्रतियोगितामा फिल्ड, ट्रयाक अन्तर्गत, कक्षा २ देखि कक्षा १२ सम्मका विद्यार्थीहरु केन्द्रित तहगत रुपमा हाइजम्प, लग जम्प, त्रिपल जम्प, सटपुट, ज्याभलिन थ्रो, १ सय , २ सय, ४ सय, ८ सय १५ सय र ३ हजार मिटरका दौड, रिलेदौड, भलिबल, चेस र मार्शल आर्टका तेक्वान्दो, कराते खेलहरु संचालन गरिएको थियो ।
समापन कार्यक्रमाका अबसरमा अभिभावकहरुका लागी विभिन्न मनोरन्जनात्मक खेलकुद र परम्परागत लाठो तान्ने खेल संचालन गरिएको थियो । खेलका बिजेता खेलाडी र अभिभावकहरुलाई कार्यक्रमका प्रमुख अतिथि, विशिष्ट अतिथि, अभिभावकहरु समेतले प्रमाण पत्र, मेडल वितरण गर्नुभएको थियो ।
कार्यक्रममा विद्यार्थीहरुको प्रतिनिधित्व गर्दै कक्षा १२का बर्खा थापाले मन्तब्य ब्यक्त गर्नुभएको थियो सो अवसरमा विद्यार्थीहरुले आकर्षक नृत्यसमेत प्रस्तुत गरेका थिए । वेष्ट पोइन्ट एजुकेशन फाउन्डेसन म्याग्दी प्रा.ली.का अध्यक्ष यज्जनलाल शाक्यको अध्यक्षतामा सम्पन्न कार्यक्रममा स्वागत विद्यालयका प्रिन्सिपल डीबी दाहाल र संचालन भाइस प्रिन्सिपल कृष्ण बहादुर जिसीले गर्नुभएको वेष्ट पोइन्ट मिडिया हबले जनाएको छ ।
