बेनी, साउन-२०, बेनीको न्यु वेष्ट पोइन्ट आवासीय माविमा अन्डर १० फुटबल प्रतियोगिता सम्पन्न भएको छ। आइतबार अपरान्ह भएको फाइनल खेलमा कक्षा १० बी बिजेता र कक्षा १० ए उपविजेता भएका छन् । प्रतियोगितामा प्रथम हुने टिमलाई ७ हजार र दोश्रो हुने टिमलाई ३ हजार ५ सय नगद पुरस्कार प्रदान गरिएको छ ।
बिजेता र उपविजेता टिमलाई वेष्ट पोइन्ट एजुकेशन फाउन्डेसन म्याग्दी प्रा.ली.का अध्यक्ष यजनलाल शाक्य, संस्थापक निर्देशक सुवासकुमार श्रेष्ठ, र जिल्ला फुटबल संघका अध्यक्ष कुमार बानियाँले पुरस्कार वितरण गर्नुभएको हो । कार्यक्रममा प्रिन्सिपल, भाइस प्रिन्सिपल, तह संयोजक तथा कक्षा १० मा अध्यापन गराउने सम्पूर्ण शिक्षक र अम्पायर लगायतलाई विद्यार्थीहरुले खादा लगाई सम्मान गरेका थिए ।
शुक्रबार देखि शुरु भएको प्रतियोगिता निम्न माध्यमिक र माध्यमिक तहको समन्वयमा कक्षा १० का विद्यार्थीले आयोजना गरेका हुन् । प्रतियोगितामा कक्षा ७ देखि १० सम्मका ८ टिमको सहभागिता रहेको थियो । प्रतियोगिता सम्पन्न गर्न विद्यालयका शिक्षकहरूबाट आर्थिक सहयोग समेत प्राप्त भएको मावि तह संयोजक सतिश श्रेष्ठले बताउनुभएको छ ।
फाइनल खेल तथा पुरस्कार वितरण कार्यक्रमको कक्षा १० मा अध्ययनरत सलोनी खत्रीले सञ्चालन गरेकी थिइन ।
