देवी जिसी /बेनी, बैशाख-३०, म्याग्दीको बेनी नगरपालिका वडा नं ४ का महिलालाई मादल बजाउने तालिम दिन शुरु गरिएको छ। बेनी नगरपालिकाले मादल बजाउने मौलिक कलाको संरक्षण गर्न र गाउँघरमा पछिल्लो समय मादल बजाउने सीप हराउन थालेपछि संरक्षणका लागि मादल बजाउने सीप सिकाउन तालिम दिन थालेको हो । तालिमको वडा अध्यक्ष अण बहादुर खड्काले मादल बजाएर उद्घाटन गर्नुभएको थियो ।
वडा कार्यालयको आयोजनामा आइतवारदेखि गीत संगीतको क्षेत्रमा अत्यावश्यक बाध्यबाधनको रुपमा चिनिने मादल बजाउने सीप सिकाई सम्बन्धी तालिम संचालन गरिएको वडाध्यक्ष अणबहादुर खड्काले जानकारी दिनुभयो । तालिममा वडाभित्रका विभिन्न टोल,वस्तीमा रहेका महिला र आमा समुहका ४० जनाको सहभागिता रहेको छ । पछिल्लो समय मौलिक कला संस्कृतिको लोप हुनथालेको भन्दै वडा कार्यालय संस्कृति संरक्षणमा जुटेको वडाध्यक्ष खड्काले बताउनुभयो । बैशाख ३० गतेबाट शुरु भएको तालिम जेठ ६ गते समापन हुनेछ ।
कार्यक्रममा वडा सचिब बिनिता रेग्मीले गाउँघरमा हुने भजन किर्तनमा मादल बजाउनेको अभाब हुने र सिप भएको मान्छेको खोजी गर्नुपर्ने बाध्यताको अन्त्य गर्न तालिमले सहयोग पूग्ने विचार व्यक्त गर्नुभयो । तालिममा मादल बजाउने सीपका साथै मादलका ताल लगायतको बारेमा कलाकार कृष्ण जिसीले एकसाता सम्म व्यवहारिक तालिम प्रदान गर्नुहुने छ ।
कार्यक्रममा जनचेतना युवा क्लबका पूर्व अध्यक्ष देवेन्द्र चोखाल र प्रशिक्षक जिसीले मन्तब्य ब्यक्त गरेका थिए । कार्यक्रम वडा नं ४ का अध्यक्ष अण बहादुर खड्काको अध्यक्षता वडा सदस्य मिना कुमारी कार्कीको स्वागत र सामाजिक परिचालक सिता थापा कुँवरको सञ्चालनमा कार्यक्रम सम्पन्न भएको थियो ।
