ध्रुबसागर शर्मा/ म्याग्दी, मंसिर-६, गौरवमय इतिहास रहेको वैभवमय भूमि नेपालको अबको बाटो के हो र कस्तो हुनुपर्छ भन्ने विषयमा म्याग्दीको दरबाङमा बुधबार (आज) विद्यार्थीहरुसँग अनुशिक्षण तथा अन्तरक्रिया कार्यक्रम सम्पन्न भएको छ । काठमाण्डौं स्कुल अफ ल अन्तर्गतको सामाजिक न्यायकर्मी विद्यार्थी निकेतनको आयोजनामा सम्पन्न सो अनुशिक्षण तथा अन्तरक्रिया कार्यक्रममा दरबाङमा अवस्थित तीनओटा विद्यालयका दुई सय बढी विद्यार्थीहरुको सहभागिता रहेको थियो ।
विद्यार्थीहरुलाई जागृत गराउने उद्धेश्यले आयोजित उक्त कार्यक्रम नेपालका सातओटै प्रदेशमा आयोजना गरिएको र गण्डकी प्रदेशका लागि म्याग्दीको दरबाङ क्षेत्रलाई छनोट गरिएको आयोजक संस्थाकी प्रशिक्षक दिक्षा जिसीले बताउनुभयो ।कार्यक्रममा समाजको विकास र गतिशीलतालाई बुझ्दै नेपालको संविधानले सामाजिक न्याय र सहभागितामूलक शिद्धान्तको आधारमा समतामूलक समाज निर्माणको परिकल्पना गरेकोले त्यो परिकल्पनालाई यथार्थतामा परिणत गर्न विद्यार्थी तथा नागरिक सचेतना कार्यक्रम संचालन गरिएको काठमाण्डौं स्कुल अफ ल मा वि.एल.एल.वि चौंथो वर्षमा अध्ययनरत विष्णु भण्डारीले जानकारी दिनुभयो ।
भ्रष्टाचार मुक्त नेपाल हरेक नेपालीको चाहना भएकोले सबैभन्दा पहिला नेपाललाई भ्रष्टाचारको दलदलबाट मुक्त गर्न आवश्यक रहेको र यो कार्य विद्यार्थीहरुको बर्गतले मात्र सम्भव हुनेभएकोले सबै विद्यार्थीहरुलाई भ्रष्टाचार विरुद्धको महाअभियानमा लाग्न आह्वान गर्दै आवश्यक तयारीको विषयमा प्रशिक्षक मन्दिरा सुवेदीले प्रशिक्षण दिनुभएको थियो । प्रशिक्षकहरुले नेपालमा समाजवादको यात्रा, कृषि सवलीकरणको सवाल, समाजवादःअर्थव्यवस्था र दिगो विकास,आर्थिक विकास र नेपालमा शिक्षा लगाएतका विषयमा विद्यार्थीहरुसँग अन्तक्र्रिया गर्दै अबको हाम्रो बाटो समाजवादको बाटो भएकोले पुंजिवादको विकल्प समाजवादलाई वनाएर अगाडी वढ्नुपर्ने वताउनुभएको थियो ।
जनप्रिय मावि दरबाङ,के.वि एकेडेमी र दरबाङ बोर्डिङ स्कुलका विद्यार्थीहरु सहभागि कार्यक्रममा प्रशिक्षकहरु विष्णु भण्डारी, दिक्षा जिसी, दिक्षा दवाडी, शिला पुन र मन्दिरा सुवेदीले प्रशिक्षण दिनुभएको थियो ।
