म्याग्दी, चैत-१, म्याग्दीको बेनीस्थित खुल्लामञ्चमा म्याग्दी कप-२०७९ सुपर लिग फुटबल प्रतियोगिता सुरु भएको छ । म्याग्दी कप २०७९ ब्यवस्थापन समितिको आयोजना र जिल्ला फुटवल संघको सह–आयोजनामा चैत १ गतेदेखि १० गतेसम्म संचालन हुने लिग फुटवल प्रतियोगिताको बुधबार गण्डकी प्रदेशका उद्योग, पर्यटन, वन तथा वातावरण मन्त्री रेशम जुग्जालीले उद्घाटन गर्नुभयो ।
मन्त्री जुग्जालीले खेलकुद क्षेत्रमा पूर्वाधारको अभाव भएको बताउँदै प्रदेश सरकारले पूर्वाधार विकासमा जोड दिएको बताउनुभयो । जिल्लाभित्रका अलपत्र योजनामा खेलमैदान समेत छन्,पूर्णता दिन निरन्तर ताकेता गरिरहेको छु’ मन्त्री जुग्जालीले भन्नुभयो ।
अवसरमा बेनी नगरपालिकामा मेयर सुरत केसीले नियमित बजेटबाट खेलकुद क्षेत्रको विकास सम्भव नभएकाले पहुँचबाटै बजेट ल्याउनुपर्ने बताउनुभयो । उहाँले नगरपालिकाको प्रयासमा सदरमुकाम बेनीको खेलमैदानको काम भइरहेपनि प्रयाप्त बजेट नभएको बताउनुभयो ।
सोही अवसरमा प्रमुख जिल्ला अधिकरी तुलसीराम पौडेलले खेलकुद गतिविधिलाई मर्यादित र खेलमैत्री बनाउनुपर्ने बताउदै प्रतियोगिता सफल बनाउन प्रशाशनिक रुपमा पूर्णत सहयोग रहने कुरा बताउनुभयो । उद्घाटन समारोहमा गण्डकी प्रदेश सांसद हरि भण्डारी, बिमला गौचन, बेनी नगरपालिकाका प्रबक्ता रमेशकुमार श्रेष्ठ, कार्यपालिका सदस्य कृष्णकुमार विश्वकर्मा उद्योग उद्योग बाणिज्य संघ म्याग्दीका अध्यक्ष बेलबहादुर कटुवाल, म्याग्दी जेसिसका अध्यक्ष सुमन बानिया लगायत जिल्लाका सरकारी निकायका प्रमुख तथा प्रतिनिधि, खेलाडीको उपस्थिती रहेको थियो ।
उद्घाटन कार्यक्रमको अध्यक्षता म्याग्दी कपका संयोजक बिक्रम सुबेदी, स्वागत जिल्ला खेलकुद विकास समितिका अध्यक्ष दिनेश केसी र सञ्चालन पत्रकार कृष्ण जिसीले गर्नु भएको थियो । म्याग्दीमा पहिलोपटक सुरु भएको लिग खेल १० दिनसम्म संचालन हुनेछ ।
आमन्त्रित म्याग्दी जिल्ला लिग फुटवल प्रतियोगितामा १० क्लवको सहभागिता रहेको म्याग्दी कप ब्यवस्थापन समितिका अध्यक्ष विक्रम सुवेदीले बताउनुभयो । प्रतियोगितामा समुहबाट विजेता र उपविजेता सेमिफाईनलमा प्रवेश गर्ने छन् ।सेमिफाईनलमा समुह ए को विजेता र समुह वि को उपविजेता र समुह वि को विजेता र समुह ए को उपविजेता विच प्रतिस्पर्धा हुनेछ ।
म्याग्दी कप लिगमा प्रथम हुनेले एक लाख १५ हजार रुपैयाँसहित ट्रफी, मेडल र प्रमाणपत्र र द्धितिय हुनेले ७० हजारसहित मेडल र प्रमाणपत्र प्राप्त गर्नेछन ।
लिग फुटवल प्रतियोगितामा अनुशासित क्लव र उतकृष्ट खेलाडीलाई नगद १० हजार र ट्रफी, उतकृष्ट गोलकिप्पर र सर्वाधिक गोलकर्तालाई जनही ७ हजार ५०० रुपैयाँ र ट्रफी, बेष्ट युवा खेलाडीलाई ५ हजार रुपैयासहित ट्रफी र म्यान अफ द खेलाडीलाई नगद २ हजारसहित ट्रफीले पुरस्कृत गरिने छ ।
