पर्बत, माघ-३, पर्बत जिल्लाबाट प्रतिनिधि सभामा निर्बाचित एमालेका सांसद पदम गिरी स्वास्थ्य तथा जनसंख्या मन्त्री बनुभएको छ । पर्वत जिल्लाबाट प्रतिनिधिसभा सदस्यमा निर्वाचित गिरी पर्वत जिल्लाको इतिहासमा संघीय सरकारमा मन्त्री हुने पहिलो व्यक्ति बन्नुभएको हो ।
राणाशासन अन्त्यपछि पर्वत जिल्लाबाट राज्य र सहायक मन्त्री ६ जना बनिसक्दा संघीय सरकारमा पहिलो मन्त्रीका रुपमा गिरीले इतिहास रच्न सफल हुनु भएको हो ।
स्कुल जीवनमै राजनीतिक रुपमा चेतनशील भइसकेका थिए गिरी अखिल नेपाल राष्ट्रिय स्वतन्त्र युनियनको राजनीतिबाट उदाउनुभएको हो । उहाँले २०५९ माघ १९ मा तत्कालीन राजाले शासन हातमा लिएपछि पृथ्वीनारायण क्याम्पसमा गणतन्त्रको माग गर्दै विरोध प्रदर्शनको नेतृत्व गर्नुभएको थियो । त्यसपछि उहाँको चर्चा धेरै नै चुलिएको थियो । २०५९ साल माघ २० गते उहाँ विरोध प्रदर्शनकै क्रममा पक्राउ पक्राउ पर्नु भएको थियो ।
संक्षिप्त परिचय
पदम गिरीको जन्म पर्वत जिल्लाको कुश्मा नगरपालिका–३, दुर्लुङमा भएको हो । उहाँको आमाको नाम सिता गिरी भने पिता स्व. बेल गिरी हुनुहुन्छ । गिरीले दुर्लुङमै रहेको काफल चौर माध्यमिक विद्यालयमा औपचारिक शिक्षा प्रारम्भ गरे पश्चात पोखरास्थित पृथ्वीनारायण क्याम्पसमा स्नाकोत्तर तहमा अध्ययन गर्नु भएको हो । उहाँ विद्यालय तहमै रहँदा नेकपा एमालेको भ्रातृ संगठन अनेरास्ववियू पाँचौको संगठित सदस्य बन्नु भएको थियो ।
दुर्लुङ गाउँदेखि सिहंदरबारसम्मको यात्रा
२०४६ सालमा नेकपा एमालेको भ्रातृ संगठन अनेरास्ववियू पाँचौको संगठित सदस्य बन्नु भएका उहाँ काफल चौर मावि दुर्लुङमा २०४८ सालमा प्रारम्भिक कमिटीको सचिव हुँदै अध्यक्षसमेत हुनुभयो ।
त्यसपछि २०५० सालमा पृथ्वी नारायण क्याम्पसमा अनेरास्ववियू पर्वत पोखरा सम्पर्क कमिटीको अध्यक्ष, २०५५ सालमा अनेरास्ववियू पृथ्वीनारायण क्याम्पसको प्रारम्म्भिक कमिटीको सचिव हुँदै स्वतन्त्र विद्यार्थी युनियनको सदस्य बन्नु भएको थियो । अन्तत: २०५७ मा उहाँ अनेरास्ववियू पृथ्वीनारायण क्याम्पसको प्रारम्भिक कमिटीको अध्यक्ष बन्न सफल हुनुभयो ।
त्यसपछि अनेरास्ववियू राष्ट्रिय परिषद सदस्य र अनेरास्ववियू केन्द्रीय सदस्य र २०५९ माघ १९ शाही कदमपछि मुलुकमा सबैभन्दा पहिला पृथ्वीनारायण क्याम्पसमा गणतन्त्रको माग गर्दैै भएको विरोध प्रदर्शनको नेतृत्व गिरीले गर्नु भएको थियो ।
गिरी २०६२ सालको स्वतन्त्र विद्यार्थी युनियन निर्वाचनमा पृथ्वीनारायण क्याम्पस पोखरामा सभापति निर्वाचित हुनुभयो । त्यसपछि अनेरास्ववियूको १९ औं राष्ट्रिय सम्मेलनबाट केन्द्रीय सचिवालयमा निर्वाचित भई स्ववियू परिचालन विभागको प्रमुख समेत बन्नु भयो ।
उहाँ नेकपा एमाले पर्वतको सातौं जिल्ला अधिवेशनबाट सदस्य पदमा निर्वाचित भई युवा फाँट प्रमुखको जिम्मेवारीसमेत सम्हाल्न सफल हुनुभएको थियो । त्यसपछि उनी नेकपा एमाले पर्वतको आठौं जिल्ला अधिवेशनबाट अध्यक्ष पदमा निर्वाचित हुनुभएको थियो ।
०७४ साल मंसिरमा भएको आमनिर्वाचनमा पर्वत जिल्लाबाट प्रतिनिधिसभा सदस्यमा निर्वाचित गिरीले तीन पटक सांसद भइसकेका नेपाली कांग्रेसका अर्जुन जोशीलाई १३ हजार मतान्तरले पराजित गर्नु भएको थियो ।
गिरी नेकपा एमाले र माओवादी केन्द्र एकतापछि गठन भएको नेपाल कम्युनिस्ट पार्टी (नेकपा)को जिल्ला अध्यक्षसमेत बन्नुभयो भने नेकपा एमालेको दशौं महाधिवेशनपछि केन्द्रीय सदस्य तथा पर्वत जिल्ला सह–इन्चार्ज र प्रतिनिधिसभा सदस्य निर्वाचन २०७९ मा दोस्रो पटक पर्वत जिल्लाबाट निर्वाचित हुनुभयो । आम निर्बाचन २०७९ मा गिरीले गठबन्धनका बिरुद्द २९ हजार ८७२ मत प्राप्त गरी विजयी हुनुभएको हो । २०७९ सालको प्रतिनिधिसभा निर्वाचनमा पनि नेपाली कांग्रेसबाट उहाँका प्रतिस्पर्धी अर्जुन जोशी नै हुनुहुन्थ्यो । जोशीलाई २२ सय ६३ मतान्तरले हराउँदै गिरी दोश्रो पटक संघीय सांसद बन्नु भएको हो ।
