म्याग्दी, कार्तिक-१६, म्याग्दीका एक युवक ठूलो मात्रामा लागू औषध सहित पोखरामा पक्राउ परेका छन् । सोमबार इलाका प्रहरी कार्यालय शिसुवा र वडा प्रहरी कार्यालय गगनगौडा कास्कीबाट खटिएको संयुक्त प्रहरी टोलीले पोखरा ३० गगनगौडा पावरहाउसस्थित सवारी साधन चेकजाँच गर्दा ठूलाे मात्रामा लागू औषधसहित ती युवकलाई पक्राउ गरेकाे प्रहरीकाे भनाइ छ ।
म्याग्दीकाे मालिका ओखरबोट स्थायी घर भई हाल बेनी ८ क्याम्पस चोक बस्ने २२ वर्षीय गौरव बुढा पक्राउ परेका हुन् । उनको साथबाट प्रहरीले लागू औषध डाईजापाम- १२६ एम्पुल, नर्फिन- १२६ एम्पुल, फेनार्गन- १२६ एम्पुल गरी जम्मा ३७८ एम्पुल र मोबाइल -१ थान सहित फेला पारी पक्राउ गरिएकाे हाे । उनलाई लागू औषध सम्बन्धी मुद्दामा कास्की जिल्ला अदालतबाट दश दिनकाे म्याद थप गरी अनुसन्धान प्रकृया अगाडि बढाइएको कास्की प्रहरीले प्रहरीले जनाएकाे छ ।
लागुऔषध कारोबार र प्रयोगकर्ता म्याग्दीमा बढ्दै गैरहेका छन् । अधिकांश स्कुल र कलेज पढ्ने उमेरका युवा युवती लागु औषधको प्रयोगकर्ता रहेको म्याग्दी प्रहरीले जनाएको छ । यसभन्दा अघि ठुलो परिणाममा बेनीको मंगलाघाटमा एक युवा पक्राउ परेका थिए । सोमबार पक्राउ गरिएको लागु औषध म्याग्दी भित्र्याउन लागेको अवस्थामा कास्की मै पक्राउ गरिएको प्रहरीले जनाएको छ ।
