म्याग्दी, कार्तिक-१६, आयुर्वेद बिकासको आधार जनशक्ति बिकास र पूर्वाधार भन्ने नाराका साथ बेनीमा राष्ट्रिय आरोग्य दिवस तथा धन्वन्तरी जयन्ती मनाइएको छ । कार्तिक १६ गते जिल्ला आयुर्वेद स्वास्थ्य केन्द्र म्याग्दीको आयोजनामा एक कार्यक्रमको आयोजना गरी धन्वन्तरी जयन्ति मनाइएको हो । समुद्र मन्थनबाट उत्पत्ति भएका आयुर्वेदका प्रवर्तक धन्वन्तरीको सम्झनामा आज धन्वन्तरी दिवस मनाउने गरिन्छ धन्वन्तरी जयन्तीलाई चिकित्सकले शुभ सङ्कल्प तथा शुभकार्य प्रारम्भ गर्ने दिनका रूपमा लिने गरिन्छ ।
कार्यक्रममा डिभिजन बन कार्यालय म्यग्देका सहायक बन अधिकृत एवं जडिबुटीका अनुसन्धानकर्ता चन्द्रमणि सापकोटाले मानिसको जीवन प्राकृतिक हो त्यसैले यसलाई प्राकृतिक रुपमै छोड्नु पर्ने बताउदै एलोप्याथिक र आयुर्बेदिक उपचार पद्दतिलाई समायोजन गरेर लैजानु पर्ने बताउनु भयो । कार्यक्रममा नविन आनन्द योग केन्द्रका प्रमुख नविन जुग्जालिले आरोग्याताको लागी योग, ध्यान र प्रणायामको महत्वको बारेमा बोल्नुभएको थियो । साथै उहाँले हरेक व्यक्तिले सजिलै गर्नसक्ने आधारभूत ६ वटा योगको अभ्यास समेत गराउनुभयो । कार्यक्रममा जिल्ला आयुर्वेद स्वास्थ्य कार्यलयका प्रमुख डाक्टर संदेश अधिकारीले आयुर्बेद चिकित्सा पद्दति यसको महत्व र भगवान धन्वन्तरीको उत्पत्ति लगायतको बारेमा बोल्नु भएको थियो ।
त्यसैगरी कार्यक्रमका विशिष्ठ अतिथि प्रमुख जिल्ला अधिकारी चिरिन्जीवी रानाले स्वस्थ जिवन यापनका लागी शारीरिक मानसिक र सामाजिक स्वास्थ्यमा ख्यालगर्दै दैनिक जीवन र क्रियाकलापलाई चुस्तदुरुस्त राख्नुपर्ने बताउनुभयो । प्रमुख अतिथि बेनि नगरपालिकाका प्रमुख हरिकुमार श्रेष्ठले आरोग्यता र योग जस्ता अति महत्वपुर्ण विषयमा हामीले अझै वेवास्ता गर्ने गरेका कारण स्वस्थ जीवनयापन गर्न नसकेको यथार्थ औल्याउदै यसको व्यापक प्रचार प्रसार र चासो बढाउनु पर्नेमा जोड दिनुभयो । कार्यक्रममा नागरिक समाजका अध्यक्ष सुदर्शन कुमार श्रेष्ठ, नविन योग केन्द्रका सुरेन्द्र शर्मा, पत्रकार महासंघ म्याग्दीका सदस्य कृष्ण जिसी, लगायतले मन्तब्य ब्यक्त गर्नु भएको थियो । कार्यक्रम जिल्ला आयुर्वेद स्वास्थ्य केन्द्र संचालक समितिका अध्यक्ष जीवनकुमार विश्वकर्माको अध्यक्षता कार्यालयका बैद्य निरीक्षक प्रेम प्रसाद गौतमको स्वागत र निमित्त कार्यालय प्रमुख कविराज दामोदर शर्माको संचालनमा सम्पन्न भएको थियो ।
देवता र दानव मिलेर वासुकी नागको नेती र मन्दराचल पर्वतको मदानी बनाई समुद्र मन्थन गर्दा धन्वन्तरीको उत्पत्ति भएको पुराणमा उल्लेख छ । नेपालमा धन्वन्तरी दिवसलाई राष्ट्रिय आरोग्य दिवसका रुपमा विसं २०५६ देखि मनाउन थालिएको छ ।
