बाग्लुङ्गको नारायणस्थानमा कृषकले थापेको पासोमा चितुवा फस्यो (भिडियो सहित )

बागलुङ, साउन-११,  बागलुङको नारायणस्थानमा एक चितुवा नियन्त्रणमा आएको छ । बाग्लुंग नगरपालिका–१४ नारायणस्थानका स्थानीयले चितुवा नियन्त्रणमा लिएका हुन् । कृषकले पालेका कुखुरा, बाख्रा लगायतका घरपालुवा पंक्षी र जनावरलाई आक्रमण गर्न थालेपछि फलामको पासो निर्माण गरेर चितुवालाई नियन्त्रणमा लिइएको हो ।

स्थानीय भक्तबहादुर सुनुवारले चितुवा नियन्त्रणमा लिनको लागी फलामको पासो निर्माण गर्नु भएको हो । आईतवार राती घरको आगन छेउमा रहेको कुखुराको खोरसँगै राखिएको पासोमा  कुखुरा खान पसेको चितुवा थुनिएको हो ।

फलामको बाकसमा तार जाली लगाएर बनाईएको पासोमा चितुवा फसेपछि स्थानीयले प्रहरीलाई खवर गरेका थिए । बयस्क चितुवा निकै चलाख देखिएकाले प्रबिधि बिना व्यवस्थापन कठिन रहेको डिभिजन बन अधिकृत मुकुन्द प्रसाद अधिकारीले बताउनु भएको छ  ।

नियन्त्रणमा लिइएको चितुवालाई ब्यनास्थापन गर्न राष्ट्रिय प्रकृति संरक्षण कोष सौराहालाई पत्रचार गरेको उहाँले बताउनुभएको छ ।  नियन्त्रणमा लिईएको चितुवालाई जंगलमा छोड्नुपर्ने भएकाले पासोबाट निकालेर अर्को खोरमा राख्न समस्या भएको हो । भोली मात्रै टोलि आउने भएकोले चितुवालाई ब्यबस्थापन गर्न समय लाग्ने भएको छ । अहिले  नारायणस्थानमा  चितुवा हेर्नेको भीड लागेको छ । भिडले गर्दा बयस्क चितुवा थप आक्रामक देखिएको बताईएको छ ।