पर्वत, साउन-१ पर्वतको एउटा गाउँमा १२ बालबालिकामा कोरोना संक्रमण पुष्टि भएको छ । कुश्मा नगरपालिका–८ चुवामा १२ बालबालिकामा कोरोना संक्रमण पुष्टि भएको हो । वडाध्यक्ष राजकुमार क्षेत्रीका अनुसार १३ महिनादेखि ११ वर्ष उमेर समूहका बालबालिका संक्रमित भएका हुन् ।
रुघाकोकी, ज्वरोलगायतका लक्षण देखिएपछि गरिएको परीक्षणमा संक्रमण पुष्टि भएको उहाँले बताउनुभयो । बालबालिका धमाधम संक्रमित भएकाले यो नयाँ भेरियण्ट हुनसक्ने आशंका गरिएको छ । पर्वतमा संक्रमणको यो घटना तेस्रो लहरको संकेतका रुपमा व्याख्या गरेपनि भेरियण्टको परीक्षण गर्न स्वास्थ्य निर्देशनालय गण्डकी प्रदेशलाई अनुरोध गरिएको वडाध्यक्ष क्षेत्रीले बताउनुभयो ।
चुवामा मात्रै अहिले बालबालिकासहित विभिन्न उमेरका ४२ जना सक्रिय संक्रमित रहेका छन् । हाल पर्वतमा सक्रिय संक्रमितको सङ्ख्या २०० रहेको छ ।
