पोखरा, असार-१७, कास्कीमा गुडिरहेको एम्बुलेन्स पहिरोमा परेको छ । मादी गाउँपालिका–९ मुग्रीबेंसीबाट बिरामी लिएर थुम्सीकोटतर्फ जाँदै गरेको एम्बुलेन्समाथि पहिरो खस्दा एम्बुलेन्समा सवार बिरामी ८३ वर्षीय गोमा अधिकारीको मृत्यु भएको हो । दुर्घटनामा एम्बुलेन्स चालक सुवास अधिकारी घाइते भएको मादी गाउँपालिका अध्यक्ष वेदबहादुर गुरुङले जानकारी दिनु भएको छ ।
मध्यपहाडी लोकमार्ग अन्तर्गत निर्माणाधीन सडकमा खहरे खोलामा एक्कासी लेदोसहितको बाढी आएर एम्बुलेन्समाथि परेको हो लेदो बगेपछि चालकले भने भागेर ज्यान जोगाएका छन् । पहिरोले एम्बुलेन्सलाई करिब सय मिटर तल बगाएको छ। एम्बुलेन्समा लैजादै गरेका बिरामीको घटनास्थलमै मृत्यु भएको र घाइते चालक अधिकारीलाई थप उपचारका लागि पोखरा पुर्याइएको छ । 
