पर्वत, जेठ-२६, तालमा पौडी खेल्ने क्रममा डुबेर म्याग्दीका एक युवकको ज्यान गएको छ । म्याग्दीको रघुगंगा गाउँपालिका – १ का अन्दाजी २३ वर्षीय रमेश पुनको तालमा डुबेर मृत्यु भएको हो । युवकको मुस्ताङको थासाङ गाउँपालिका – २ स्थित सेकुङ तालमा पौडी खेल्ने क्रममा डुबेर मृत्यु भएको हो गण्डकी प्रदेश प्रहरी कार्यालयले जनाएको छ ।
भेडी गोठमा काम गर्ने रमेश मंगलबार भेडा चराउने क्रममा तालमा पौडी खेल्न जाँदा डुबेर हराएका थिए । तालमा खोजी गर्दा बिच भागमा उनको मृत शरीर फेला परेको प्रहरी नायव उपरीक्षक श्यामु अर्यालले जानकारी दिनुभयो । रमेशले लामो समय देखि मुस्ताङ्गको सेकुङ स्थित नेत्र प्रसाद राम्जाली पुनको भेडी गोठमा काम गर्दै आइरहेका थिए । घटनाको बारेमा अनुसन्धान भइरहेको प्रहरीले जनाएको छ ।
