पर्बत, बैशाख-२७, शुक्रराज ट्रपिकल तथा सरुवा रोग अस्पतालका निर्देशक डा. सागरकुमार राजभण्डारीले आफूहरु कोरोना भाइरसको संक्रमणको चरम बिन्दूमा पुगेको र अस्पतालहरुमा बिरामी राख्ने ठाउँ नभएको समेत स्पष्ट पार्दै सचेत रहेर घरमै बस्न आग्रह गर्नु भएको छ ।
उहाँले युके भेरियन्ट, इन्डियन भेरियन्टमात्र हैन अब काठमाडौं भेरियन्ट पनि हुन सक्ने भन्दै यसको परीक्षण गर्नुपर्नेमा जोड दिनुभयो । उहाँले भन्नुभयो, ‘काठमाडौंमा संक्रमित बढी छन्, संक्रमण कम गर्न परीक्षणको दायरा बढाऔं ।’
कोरोना महामारी रोक्ने जिम्मा सबैको दायित्वभित्र पर्ने भएकोले अनुरोध गर्दै भन्नु भयो, ‘नेपालीहरु अत्यन्त ज्ञानी हुनुहुन्छ । उहाँहरु घरमै बस्नुहुन्छ । निषेधाज्ञा धेरै लम्बिदैन । सम्वेदनशील होऔं ।’ नियन्त्रण गर्न सकिन्छ ।’
सोमबार ज्यान गुमाउने १३९ जना मध्ये धेरैजसो अक्सिजनको अभावमै ज्यान गएको बताउनुभयो । अस्पतालको पेटीपेटीमा राखेरै पनि बिरामीको उपचार गरिएको भन्दै उहाँले अक्सिजन दिनका लागि पेटीमै भए पनि राखिएको बताउनुभयो ।
विभिन्न कारणले गर्दा बजारमा अक्सिजनको अभाव देखाइएको हुन सक्ने बताउदै लुकेका सिलिन्डरहरु जम्मा गर्ने काम पनि भइरहेको बताउनुभयो । सर्वसाधारणले घरमा अक्सिजन लुकाएर राखेको हुन सक्ने आँकलन गर्दै उहाँले त्यसरी नराख्न अनुरोध गर्नु भयो ।
डा राजभण्डारीले ‘मास्कको अनिवार्य प्रयोग गर्न अनुरोध गर्दै च्यापूमा राख्ने र नाकमुनी राख्ने जस्तो हेलचेक्र्याई नगर्न अनुरोध गर्नुभयो । उहाँले घरभित्र बस्दा पनि मास्क लगाउन, साबुन पानीले मिचीमिची हात धुनु पर्ने भन्दै सीमा नाकामा थप कडाइ र त्यसको ब्यबस्थापनमा जोड दिनु भयो ।’
