पोखरा, वैशाख-१६, कास्कीमा आजदेखि एकहप्ताका लागि निषेधाज्ञा सुरु भएको छ । कोरोना संक्रमितको संख्या बढ्दै गएपछि जिल्ला प्रशासन कार्यालय, कास्कीले सोमबार १५ गतेदेखि २१ गतेसम्मका लागि निषेधाज्ञा जारी गर्ने निर्णय गरेको हो ।
पोखराका मुख्यमुख्य चोकमा सुरक्षाकर्मीले कडाइका साथ चेकिङ गरिरहेका छन् । निषेधाज्ञापछि बिहानैदेखि कास्कीको मुख्य शहरी क्षेत्र पोखरामा मानिसको चहलपहल सुनसान छ । बजारका अत्यावश्यकबाहेकका कुनैपनि पसलहरु खुलेका छैनन् ।
बिहानैदेखि सुरक्षा व्यवस्था कडाइ पारिएको छ । सम्पूर्ण भिडभाडजन्य गतिविधिहरु बन्द गर्न आदेश दिएपनि यातायतामा भने जोरबिजोर प्रणाली लागू गरिएको छ । तर बाटोमा फाटफुट मोटरसाइकल, ट्याक्सी, सार्वजनिक बसलगायत सवारी साधन चलेका छन् ।
मास्क नलगाएकालाई सम्झाउने र ‘जोर’ अंकमा सवारी साधन चलाउनेलाई कारवाही गरिहेको छ । निषेधाज्ञा कार्यान्वयनका लागि जिल्ला प्रहरी कार्यालय कास्कीबा ६ सय ३५ जना प्रहरी खटिएका छन् ।
