चर्चित कार्यक्रम प्रस्तोता रवि लामिछानेले न्युज २४ टेलिभिजन छाडेका छन् । पाँच वर्षपछि न्युज २४ टेलिभिजनबाट बाहिरिएको लामिछानेले पुष्टि गरे । आफूले टेलिभिजन छाडेकोबारे उनले न्युज टिमलाई पनि जानकारी गराइसकेका छन् ।
उनी चर्चित टेलिभिजन कार्यक्रम ‘सिधा कुरा जनतासँग’का प्रस्तोता हुन् । चार वर्षदेखि लामिछानेले चलाउँदै आएको सिधा कुरा जनतासँगको ६ सय ३५औँ शृंखला बिहीबार प्रसारण हुँदैछ । पाच महिना अघि राजिनामा दिएका उनको राजिनामा स्वीकृत भने नभएको बताइएको छ ।
न्युज २४ टेलिभिजनको कार्यक्रम विभागमा प्रमुख कार्यकारी निर्माता एवं प्रस्तोताका रूपमा कार्यरत लामिछाने नयाँ टिभी खोल्ने तयारीमा रहेको बताइएको छ । कुन टिभी, कुन कार्यक्रम भन्नेबारे चाँडै नै उनले जानकारी गराउने उनले बताए ।
नागरिक सरोकारका विषयमा खरो प्रस्तुतिका कारण उनी निकै लोकप्रिय छन् । टेलिभिजनमा मात्रै नभएर युट्युबमा पनि उनको कार्यक्रम नेपालको हकमा सर्वाधिक हेर्ने गरिएकोछ । लामिछानेले अप्रिल २०१३ मा न्युज २४ टेलिभिजनमार्फत निरन्तर ६० घण्टाभन्दा बढी समय अन्तर्वार्ता गरी विश्व कीर्तिमान् बनाएका छन् ।
