मुख्य समाचार राजनीति

‘प्रचण्डले ‘अर्को माओवादी जमिन्छ’ भन्नुको भित्री कारण यस्तो पो रहेछ’

माघ २६, काठमाडौं । सत्तारुढ नेकपाका अध्यक्ष पुष्पकमल दाहाल प्रचण्डले ‘अर्को माओवादी जमिन्छ’ भन्ने अभिव्यक्ति दिएपछि नेपाली राजनीतिमा नयाँ तरंग आएको छ ।

यो समाचार अनलाइनखबरमा छ । भेनेजुएला प्रकरणमा प्रधानमन्त्री एवं पार्टी अध्यक्ष केपी शर्मा ओलीसँग जुहारी चलिरहेका बेला अर्का अध्यक्ष प्रचण्डले सार्वजनिक मञ्चमै ‘माओवादीलाई सिध्याइयो, जे गरेपछि हुन्छ भन्ने ठाने अर्को माओवादी जन्मन्छ’ भनेका हुन् । यसको यो अभिव्यक्तिले स्वयंम नेकपामा हल्लीखल्ली मम्चिएको छ ।

कतिपयले सत्तारुढ नेकपामा फुट आउन लागेको त होइन भन्ने आशंका समेत गरेका छन् । तर, प्रचण्डलाई नजिकबाट चिन्ने नेताहरु भने यो अभिव्यक्ति त्यो स्तरको नभएको बताउँछन् । तर, प्रचण्ड प्रधानमन्त्री ओलीसँग असन्तुष्ट रहेको स्वीकार गर्छन् ।

एमाले र माओवादीबीच पार्टी एकता गर्दा नेकपामा दुबै अध्यक्ष कायम रहने साझा सहमति थियो । आलोपालोको भद्र सहमति पनि भएको नेताहरु बताउँछन् ।

तर, एकीकृत पार्टीमा ओलीले एकलौटी गरेको पूर्वमाओवादी नेताहरुको गुनासो छ । प्रधानमन्त्री समेत भएकाले प्रचण्ड सहयोगी जस्तो मात्र देखिनु स्वभाविक भएपछि ओलीले पार्टी र सरकार सञ्चालनमा एकलौटी गर्न खोजेको उनीहरु बताउँछन् ।

अझ बुधबार एउटा टेलिभिजन अन्तर्वार्तामा ओलीले भेनेजुएला प्रकरणमा प्रचण्डले जारी गरेको वक्तव्य चिप्लिएको मात्र भनेनन्, ‘एक जना साथीले दिएको वक्तव्य’ भनेपछि प्रचण्ड असन्तुष्ट बनेको निकटवर्तीहरु बताउँछन् । एक नेताले भने, ‘प्रचण्डले नेकपामा अर्का अध्यक्ष पनि छ भन्ने सन्देश दिनु भएको हो ।’

साथै द्वन्द्वकालीन मुद्दाहरु टुंग्याउन सरकारको अपेक्षाकृत काम नगरेको पूर्व माओवादी नेताहरुको बुझाइ छ । सतय निरुपण तथा मेलमिलाप र वेपत्ता छानविनसम्बन्धी आयोगको म्याद त थपिएको छ तर, ऐन संशोधन अझै टुंगो लागेको छैन ।

यसबारे प्रमुख विपक्षी कांग्रेस र द्वन्द्व पीडितहरुसँग पनि निरन्तर सम्वाद भने भइरहेको छ ।

सरकारले ऐन संशोधनमा अलमल गरिरहँदा आममाफी दिन खोजिएको भन्दै विरोध समेत भयो । राष्ट्रसंघ र युरोपेली युनियनसहित ७ देशले संयुक्त वक्तव्य जारी गर्दै दबाव दिए । सरकारले त्यसको प्रतिवाद त गरेको छ तर, सरोकारवाला पक्षलाई समेत विश्वासमा लिएर यो मुद्दा टुंग्याउने ठोस खाका कोरेको छैन ।

जबकी प्रचण्ड यसलाई जति सकिन्छ, छिटो टुंग्याउन चाहन्छन् । ‘अर्को माओवादी जन्मिन्छ’ भन्ने उनको अभिव्यक्तिले सरकारलाई दबावसँगै अन्तराष्ट्रिय समुदायलाई पनि जवाफ भएको प्रचण्ड निकट पूर्व माओवादी नेताहरु बताउँछन् ।

शुक्रबार प्रचण्डले गरेको भाषण पढ्नुहोस

अर्को माओवादी जन्मन सक्ने प्रचण्डको चेतावनी

सत्तारुढ दल नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले शान्ति सम्झौता र संविधानको मर्म विपरित कतिपय कदमहरु चालिएकोमा चिन्ता व्यक्त गरेका छन् ।

राजधानीमा आयोजित एक पुस्तक विमोचन कार्यक्रममा बोल्दै प्रचण्डले शान्ति सम्झौता र संविधानको मर्म र भावनाविपरित अघि बढे देश फेरि पनि द्वन्द्वमा फँस्न सक्ने चेतावनी दिएका हुन् ।

प्रचण्डले कसैको नाम त लिएनन् तर, माओवादीलाई सिध्याइहालियो, अब जे गरे पनि हुन्छ भन्ने नठान्न चेतावनीसमेत दिए । प्रचण्डले भने, ‘कार्यान्वयनको प्रक्रिया हेर्दा स्थानीत र प्रादेशिक तहलाई संविधानले जुन मर्मका साथ व्यवस्था गरेको छ, त्यसअनुसार कार्यान्वयन हुन थालेको छ ? विस्तारै कमजोर त पारिँदै छैन ?’

शान्ति सुरक्षा, बजेटलगायतमा विषय सरकार संविधानको भावनाअनुसार नचलेको उनको आरोप छ । ‘सिंहदरबारबाट अधिकार प्रत्यायोजन गर्ने, कर्मचारी समायोजन गर्नेतिर ठीक ढंगले अगाडि बढेका छौं ? फेजआउट गर्नेतिर त गइरहेका छैनौं ?’ नेकपा अध्यक्ष प्रचण्डले भने, ‘सोच्नुपर्ने ठाउँमा जाँदैछौं ।’

अध्यक्ष प्रचण्डले भने, ‘माओवादीलाई सिध्याइहालियो ठान्यो भने दुर्भाग्यपूर्ण हुन्छ । अर्को माओवादी जन्मिन्छ, झन ठूलो लडाइँ हुने खतरा आउँछ ।’

नेकपा अध्यक्ष प्रचण्डले शान्ति सम्झौताको मर्म विपरीत पुराना मुद्दाहरुलाई पुलिस कहाँ पठाउने र पक्राउ गर्न थालिएको भन्दै असन्तुष्टि जनाए । ‘हामीले शान्ति सम्झौतामा जे प्रतिज्ञा गर्‍यौं र संविधान बनाउँदा जेजति अधिकार प्रत्यायोजन गर्ने कुरा गर्‍यौं, त्यो इमान्दारिताका साथ लागु गरेनौं भने नचाहँदै नचाहँदै द्वन्द्व हुन्छ ।’

पुरानै संरचना र कार्यशैलीतिर फर्किने प्रयासले मधेस र पहाडमा विकरात स्थिति सिर्जना हुन सक्ने प्रचण्डको चेतावनी छ । संविधानको मर्मअनुसार ऐन बनाउनुका साथै त्यसको इमान्दारिताका साथ कार्यान्वयन गर्नुपर्नेमा उनले जोड दिएका छन् ।